2013 წლის 26 დეკემბერს, საქართველოს საპატრიარქოსთან არსებული ახალგაზრდობის სულიერი და ინტელექტუალური განვითარების ცენტრის დარბაზში, გაიმართა ქართული ფოლკლორის მოსწავლეთა სასახლის ვაჟთა ანსამბლ „ერქვანის“ მესამე დისკის წარდგინება, რომელშიც შესულია აუდიო და ვიდეო მასალა.
ღონისძიებაზე ანსამბლმა შეასრულა ხალხური სიმღერები და საგალობლები. საღამოს უძღვებოდა რეჟისორი თამარ თაგვაძე. ესწრებოდნენ: სხვადასხვა ანსამბლების ლოტბარები და მოწვეული სტუმრები.
ვაჟთა ფოლკლორული ანსამბლი „ერქვანი“ შეიქმნა 2001 წელს ქართული ფოლკლორის მოსწავლეთა სასახლეში, მუსიკალური სკოლის ბაზაზე. თორმეტწლიანი არსებობის მანძილზე „ერქვანმა“ წარმატებებს მიაღწია - არის მრავალი ეროვნული თუ საერთაშორისო ფესტივალების, პროფკავშირების პრემიის ლაურეატი, სახელმწიფო დიპლომის - „V-ვეგა“ მფლობელი. „ერქვანი“ საერთაშორისო ფესტივალების ოთხგზის გრანპრის მფლობელია.
ანსამბლი სიმღერის გარდა სხვადასხვა კუთხისა და კილოს საგალობლებს გალობს. ამ მხრივ აღსანიშნავია ანსამბლის თანამშრომლობა სამების საკათედრო ტაძართან და საპატრიარქოსთან. აღდგომისა და შობის დღესასწაულებზე „ერქვანი“ სხვა რამდენიმე ანსამბლთან ერთად გალობს სამების საკათედრო ტაძარში. 2009 წელს საპატრიარქოს მიერ ანსამბლს ქართული კულტურის დესპანის წოდება მიენიჭა.
დღესდღეობით ანსამბლში ხუთი თაობის წარმომადგენელი მღერის. „ერქვანის“ რეპერტუარი საკმაოდ მდიდარია კუთხური და ჟანრობრივი მრავალფეროვნებით.
აქტიურია და აღსანიშნავი ანსამბლის საგასტროლო მოღვაწეობაც. 2013 წლის 21-26 აგვისტოს საფრანგეთში, კერძოდ პარიზში, გამართულ III საერთაშორისო ფესტივალზე, სადაც თავი მოიყარეს სხვადასხვა ჟანრის მომღერალთა გუნდებმა, ანსამბლი დაჯილდოვდა მთავარი პრიზით - “GOLD DIPLOMA”. ამ მხრივ ფესტივალი საკმაოდ ღირებული და წარმატებული გამოდგა „ერქვანისთვის“.
გუნდის ხელმძღვანელი და ლოტბარი კახაბერ შაქიშვილი თბილისის სახელმწიფო კონსერვატორიის კურსადმთავრებულია საგუნდო-სადირიჟორო სპეციალობის განხრით. იგი ბავშობიდან ანსამბლ „მართვეს“ წევრია. კახაბერ შაქიშვილი შემდგომში მღეროდა სახელმწიფო საგუნდო კაპელაში და სახელმწიფო აკადემიურ ანსამბლ „რუსთავში“. ორ ათეულ წელზე მეტია კახაბერ შაქიშვილი მომღერალთა თაობებს ზრდის ქართული ფოლკლორის მოსწავლეთა სასახლეში.
დღესღეობით „ერქვანი“ კვლავ სრული დატვირთვით განაგრძობს მუშაობას და რეპერტუარს საარქივო მასალით ამდიდრებს.