2013 წლის 8 მაისს საპატრიარქოსთან არსებული ახალგაზრდობის სულიერი და ინტელექტუალური განვითარების ცენტრის დარბაზში (წმ. სამების საკათედრო ტაძარი), ელენე ახვლედიანის სახელობის ბავშვთა სურათების გალერეის ტრადიციული „სააღდგომო გამოფენა“ გაიხსნა. შეიძლება ითქვას, რომ წლევანდელი გამოფენა საიუბილეოა, რადგან პირველი გამოფენა მოეწყო 1979 წელს სახელით „ბუნება და ძეგლი“. „სააღდგომო“ ეწოდა გასული საუკუნის 90-იანი წლებიდან. წლევანდელი „სააღდგომო გამოფენა“ შეადგენს საქართველოს საპატრიარქოს ტრადიციული მუსიკალური ფესტივალის „აღდგომიდან ამაღლებამდე“ შემადგენელ ნაწილს. ექსპოზიციაში წარმოდგენილია ბავშვთა ნამუშევრები როგორც თბილისიდან, ისე საქართველოს სხვადასხვა რაიონიდან: ძალისი, საჩხერე, თელავი, საგარეჯო. გამოფენაში მონაწილეობს 240 ავტორი. ნამუშევრები შესრულებულია სხვადასხვა ტექნიკით, თემატიკა მრავალფეროვანია. რელიგიური თემების გარდა გამოფენილია პეიზაჟები, პორტრეტები, ნატურმორტები, გამოყენებითი ხელოვნების ნიმუშები და სხვა. გამოფენის მიზანია , ბავშვები უკეთ გაეცნონ მართლმადიდებლურ რელიგიას, ბიბლიისა და სახარების შინაარს, ხოლო „გალერეის“ თანამშრომლები ყველანაირად ცდილობენ ქართველი ბავშვების ნიჭი და ხელოვნება გააცნონ ფართო საზოგადოებას და ჩამოსულ სტუმრებს. გამოფენა ტარდება ორ ნაწილად: პირველი გაიხსნა კონსერვატორიაში - 7 მაისს და აქ წარმოდგენილია „გალერეის“ ფონდებში დაცული „სააღდგომო გამოფენის“ ნამუშევრები, ხოლო მეორე დღეს მოქმედი ბავშვების ნამუშევრების გამოფენა გაიხსნა საქართველოს საპატრიარქოს ახალგაზრდული ცენტრის საგამოფენო დარბაზში. კონსერვატორიაში გამოფენა გასტანს 12 მაისამდე, საპატრიარქოს ახალგაზრდულ ცენტრში 16 მაისამდე.